فايق لـ«وزير الرياضة»: «موضوع الأهلى مش مستاهل»!

انتقد الإعلامى إبراهيم فايق، صباح اليوم الأربعاء، طريقة المهندس خالد عبد العزيز، وزير الشباب والرياضة، فى التعامل مع أزمة حل مجلس إدارة الأهلى.

وقال فايق، ببرنامجه "ملعب 9090"، على الراديو 9090: "إمبارح اترفض الطعن المقدم من النادى الأهلى، معروف أنه هيترفض، لكن الغريب بقى هى تصريحات وزير الرياضة، التى أدلى بها حول الموضوع، كما لو أنه لسه عارف الأزمة، قال لسه هسأل مجلس الوزراء وهسأل معرفش خبير إيه".

وتابع: "قال كمان إنه هياخد القرار بعد ما ياخد رأى كل الوزراء فى الحكومة وكمان رئيس الوزراء، مش عارف ليه بيقول كده، مع إن الأمر سهل، ومش مستاهل الكلام ده كله، وده هيدى انطباع مش إيجابى، وبيشعر البعض أن الوزير خايف، ومنين يقول هنعين المجلس ومنين يقول هناخد رأى الناس".

وأضاف فايق: "تصريحات وزير الرياضة مفاجئة، بيقول لسة هقعد مع أعضاء مجلس إدارة الأهلى، يعنى لسه هتقعد وتشوف مين هيوافق ومين هيرفض، اعملوا زى نواب البرلمان المعينين".

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع 4 مرات أسبوعيًا، من الأحد إلى الأربعاء فى تمام العاشرة صباحًا، ولمدة ساعة.