«بسطوها متجعلصوهاش»
مفيش داعى إلى التركيز على الماديات فى الزواج، والمبالغة فى الطلبات من العريس والعروسة.. العشرة والمحبة بين الزوجين أهم من كل الحاجات دى.
كمية التفاصيل اللى إنت بتتعامل معاها وأنت بتتجوز تفاصيل لا تنتهى، بداية من الخطوبة وقراءة الفاتحة، والعفش، والزفة، وعربية الزفة.. كل المناسبات دى مفصلية وبتتطلب ترتيبات كتيرة.
فيه ناس بتبالغ أوى فى الزفة تبقى زى زفة فيروز، ولاَّ كمنجان، ولاَّ بالريمات، ولا هتبقى زى زفة ماجدة الرومى.. وكمان العروسة تبص تلاقيها بتدى هدايا لصاحبتها كتيرة جدًا وملهاش لازمة زى فستان لكل واحدة علشان يتصوروا وهما عاملين بوظ البطة، وكمان أسورة عليها دلاية نحاس، وحاجات ياريت تنقرض بقى من المجتمع".
وأخيرًا العروسة تبات خميس بجمعة مع الكوافير ترجع كأنها واحدة تانية.. والحلاق يوصل العريس لمرحلة لكل اللى يشوفه كأنه أول مرة يستحمى فيها فى حياته.. بسطوها متجعلصوهاش.. ربنا أدرى الناس بتوع زمان كانوا سعداء إزاى ومركزوش على التفاصيل الكتيرة دى.. دوَّروا على الفرحة مش على التفاصيل ووجع الدماغ.
