«اللى بنى مصر كان فى الأصل مقاول»
وقالت إسعاد: "فى زمن الدراما الجميل كان فى مسلسل عنوانه "بوابة الحلوانى"، معتمد على مثل مصرى جميل بيقول "اللى بنى مصر فى الأصل كان حلوانى".
وأكدت: "سرحت أنا كده فى المثل والمسلسل اللى مالوش علاقة بالمثل أساسًا غير العنوان، وسألت نفسى سؤال عميق، أعمق من "بوستات" النشطاء والمعارضين وبتوع يسقط أى حاجة حتى امتحانات الابتدائية".
وأضافت: "علشان أعرف إجابة السؤال دا كان لازم ارجع للكتب، ناس قالت أن اللى بنى مصر الحديثة، كان الخديوى إسماعيل اللى كلنا عارفين من الكتب إنه كان وحش وغرق مصر فى الديون، بس ماحدش قالنا إن هو نفس الراجل اللى سابلنا القاهرة الخديوية الجميلة اللى كلنا بنتمنى نرجع زى ما كانت (باريس الشرق)".
وأوضحت: "فيه ناس تانية بتقول الحدوتة مش كده لا الخديوى ولا غيره، الحدوتة أن فيه حاكم زمان لما بدأ يبنى فى مصر جاب مقاول كبير من عيلة اسمها الحلوانى وقعد معاه قعدة طويلة انتهت أن الحلوانى دا يبنى مصر على مزاج الحاكم".
وأكدت: "ومع الوقت وانتشار المبانى فى مصر، اللى بنى مصر هو الحلوانى مش الحاكم".
وأشارت إلى أن: "الحاكم قفش على الحلوانى وقرر ينفيه لعل وعسى الناس تنسى الحدوتة دى، وتفتكر أن الحاكم مش الحلوانى هو اللى بنى مصر، بس نعمل إيه فى الذاكرة الشعبية الحديد؟".
وتابعت: "مع العلم أن اللى بنى مصر أساسًا ونقصد بمصر "القاهرة" بس بلغة أهالينا اللى بيتعاملوا مع القاهرة على أنها مصر"، هو عبد صقلى شائت الظروف أنه يكون قائد جيش الفاطمين ولما شاف حتة أرض واسعة كدة قالك أبنى عاصمة للخليفة الفاطمى وسماها القاهرة".
وقالت: "كل دى نظريات وتفاصيل فى اللى بنى مصر بس الحقيقة اللى أنا عارفاها أن اللى بنى مصر كان فى الأصل يا حبيبى مقاول زى مبؤلك كده".
وأضافت: "وبدأ مشواره بشيل الطوب والرمل والأسمنت، مقاول باع قراطين طين فى البلد واشترى أرض فى فيصل أو الهرم وعمله عمارتين وباعهم تمليك وبفلوسهم اشترى أرض تانية وتالتة".
وأكدت: "المقاولين هما اللى بنوا مصر اللى إحنا نعرفها بكل عشوائياتها وتفاصيلها تلاقيهم فى أى مكان جديد صالح للمبانى وإقامة العمارات".
وأوضحت: "المقاولين ناس نقدر نقول عليهم بناءين عظام زى ما بنوا الكرنك ومعبد الفيلة، بيعموا أبراج غريبة فى فيصل وشارع العشرين، وهما اللى حولوا حدائق الأهرام لكتل خرسانية جنب بعض".
وتابعت: "العيب فى مين بقى؟ مش عارفه أنا الصراحة بس أنا بقيت مقتنعة تمامًا أن مصر من أو التمنينات وإنت جاى كدة اللى بناها وشطبها وخلاها تشطيب على المفتاح هما المقاولين".
واختتمت حديثها قائلة: "ولهذا ومن موقعى هذا أطالب بتعديل المثل اللى بيقول "اللى بنى مصر كان فى الأصل حلوانى" إلى "اللى بنى مصر كان فى الأصل مقاول".
