الغندور: اللى الحكام شايفينه هيعملوه.. وماحدش هياخد الدورى على حسابنا

وتوقفت مباراة المصرى وسموحة فى الدقيقة 90 من عمر اللقاء، لاعتراض التوأم على قرار حكم المباراة بعدم احتسابه لركلة جزاء، حيث نزل العميد وجهازه الفنى إلى أرض الملعب اعتراضا على حكم المباراة، وهو ما أدى لتوقف اللقاء لعدة دقائق قبل أن يتم استئنافها مرة أخرى بعد طرد حسام حسن خارج الملعب، ليعلن بعدها المصرى انسحابه من الدورى فى حالة إصدار عقوبه على الجهاز الفنى.

وكشف الغندور، للإعلامى إبراهيم فايق، ببرنامجه "ملعب 9090"، على الراديو 9090: "والله اللى حصل فى المباراة حصل قدام الجميع، ومن الأمانة أن يكتب الحكم تقريره بأمانة شديدة، وكمان الحكام بيرسلوا تقاريرهم فور انتهاء المباراة مباشرة، حيث إنها لا تكتب بخط اليد ولكن على الكمبيوتر".

وأضاف: "أنا مش عارف الكابتن حسام حسن عاوز إيه بالظبط، كنا فى دورة تدريبية عن التحكيم، وضربنا أمثلة عن لاعبين كتير ومنهم لاعب من المصرى إنه بيتحايل على الحكام، إحنا بندرس حالات تحكيمية من كل الأندية وعلى كل اللاعبين".

وتابع رئيس لجنة الحكام: "مش عارف أفهم إيه الخطأ فى الكلام ده، وكمان مفيش مشكلة خالص مع التوأم، ومفيش منافسة ما بينا فى أى حاجة، وشايف أن الأمور بتتطور بشكل غير طبيعى، مع أن الأمور عادية جدا".

وواصل: "عموما ده موسم الضغط على الحكام، وإحنا عارفين ده كويس وفاهمينه، وإحنا مش فى دماغنا، واللى إحنا عاوزينه وشايفينه هنعمله، واللى ياخد الدورى ياخده، بمجهوده مش على حساب الحكام".

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع 4 مرات أسبوعيًا، من الأحد إلى الأربعاء فى تمام العاشرة صباحًا، ولمدة ساعة.