قانون حماية المنتج المصرى

وقالت إسعاد: "محمد على باشا أو محمد على الكبير، الرجل الألبانى الشبه أمى، يعنى علاقته باللغة العربية زى علاقة كتير من المصريين باللغة الصينى، الرجل ده على قد ما ظلم الشعب المصرى فى حاجات على قد ما كان له أيادى بيضا على تاريخ مصر الحديث.. الحق يتقال الرجل كان عنده طموح ورؤية ملهاش حل، بنى مدارس ومصانع وسيطر على أدوات الإنتاج والزراعة وعمل نهضة حقيقية فى مصر، المهم يعنى ولى النعم محمد على باشا لما قرر أنه يدخل بمصر فى منظومة الإنتاج الصناعى ويطور من قدرات مصر الإنتاجية، كانت عينه على السلع الأجنبية المنافسة، شايف أنها ممكن تشكل خطر على المنتج المصرى، طيب يعمل إيه؟ يتصرف إزاى؟، يحمى المنتج المصرى إزاى من المنافسة، مع أنه رجل شبه أمى لكنه كان رجل واعى جدًا، وسياسى ملهوش حل، كان بيفكر لقدام".

وأضافت: "قعد يفكر لغاية ما لقى حل يحمى به المنتج المصرى، اللى لسه طالع جديد من المنافسة الخارجية، على الأقل يعنى داخل الأراضى المصرية، يعمل إيه؟ قام عامل قانون سماه خيانة الأمانة، كتير مننا عارف أن القانون المصرى معرفش قانون خيانة الأمان إلا بعد زمن محمد على بشويتين حلوين، ونص قانون العقوبات على 5 حالات لو حصلت تعتبر خيانة للأمانة، وهى إيه، تبديد شىء استلمه المؤتمن عليه سواء على سبيل الوديعة أو الوكالة أو الإيجار أو الرهن، بس إيه قانون خيانة الأمانة بتاع محمد على، عمنا محمد على قال اللى يشترى منتج أجنبى وفيه زيه منتج مصرى يبقى خاين للأمانة، أه كدة وش مفيش تفاهم، ودى بقى جريمة جديدة مش بس فى مصر لا فى العالم كله الصراحة، وهى جريمة شراء مصنوعات غير وطنية لا ينتجها المصريون".

وأوضحت: "وحدد عقوبة للجريمة اللى هى إيه، لو قيمة المصنوعات أو المحاصيل 5 الآف قرش يُعاقب صاحب الجريمة بالسجن سنتين إلى 5 سنين فى اللومان، ويفضل مربوط فى الحبس بالجنزير، ولو ثبت أنه اشترى بحسن نية من غير ما يعرف أن المحاصيل دى لها بديل مصر يعامل برفق ويتربط سنتين بس فى القلعة، يعنى لو عارف فى اللومان ولو مش عارف فى القلعة".

وتابعت: "فى ناس بتقول إنه اللى عمله محمد على ده عمله عشان يحمى استثماراته ومصانعه هو والأراضى اللى كان محتكرها، وده للأمانة جزء من القصة، بس شوف الرجل عمل إيه عشان يرفع من قيمة المنتج المصرى، الرجل أجبر الناس أنها تشترى المنتج المصرى بطريقة ما، إزاى؟، قالك اللى يشترى حاجة مش مصرية يبقى خاين للأمانة وش، فى ناس قالت إنه أول قانون وآخر قانون حاول يحمى الصناعات المصرية، وأول قانون يحاول الثروة الفردية إلى ثروة وطنية، ده محمد على باشا الرجل الأمى، اللى لحد دلوقتى فى ناس بتسخر منه، بس للأمانة الرجل ده عمل لمصر كتير أوى، كان سابق عصره بزمان".