«ما تشيلش أتب حد»
وقالت إسعاد: "فى ليلة رمضانية لطيفة كنت قاعدة كدة بتسلى فى الحاجات اللى بالكوا فيها أيشى مكسرات على كام حتة كنافة وقطايف القصد عشان مطولش عليكوا اتفاجأ بمشهد يوقف الكنافة بالمانجا فى الزور".
وأضافت: "الواد المبدع اللى اسمه محمد ممدوح عفأ البت المبدعة دينا الشربينى على كتفه اليمن والواد الرضيع فى إيده الشمال وهوب رماهم على بابا أوضة مراد اللى كان قاعد يبدع جوه فى الأوضة لوحده وراح قايله الجملة اللى بالدراما بتاعت الشهر كله "الحاجات دى تخصك متخصنيش" يا قوة الله، عظمة على عظمة على عظمة يا كل المبدعين كاتب ومخرج ومصور وإنتاج وممثل ومزيكا وإضاءة وإكسسوار حتى عامل البوفية، أبدعتوا ومتعتوا وأبهرتوا الصراحة".
وأوضحت: "بس بعيد عن المسلسل العظيم ده وفريق العمل العظيم لكن المشهد ده بالأخص وبغض النظر عن الزروطة التى تسببت فيها الكنافة بالمانجا وقفنى قصاده كتير وأخدنى لحتت أبعد للتدقيق العملى للموقف، تخيل لو قررت للحظة أنك ترجع كل حاجة لأصحابها تصحى الصبح وأنت نازل تفوت على جارك اللى فوق منك، صباح الخير، وتروح ساحب مكنسة بالكهربا ورازع ماتورها فى ودن نص ساعة متواصل وطالعله 4 عيال بيجروا وتقوله اقعد بالعافية الحاجات دى تخصك ماتخصنيش وأنت نازل تخبط على اللى جنب منك صباح الخير كيس الزبالة اللى جنب بيتى ده يخصك مايخصنيش، تنزل الشارع تجيب بلدوزر يشيل العربية وتكتب على نوت لطيفة الركنة المتخلفة دى تخصك ماتخصنيش.. تمشى بالعربية تدخل على طريقك تلاقى واحد جاى عكس الاتجاه تروح قايله دخولك فى الممنوع يخصك مايخصنيش، تروح الشغل تقابل زميلك الأصفرانى تاخد نفسنته وسواده وترميهم على مكتبه وتقوله البلاوى دى تخصك ماتخصنيش، زميلك التانى يجى يرمى قلة حيلته وعجزه وفشله على كتافك هوب تحطهم فى كيسة سمرة كدة وتديهاله وتقوله الطاقة السلبية دى تخصك ماتخصنيش".
وتابعت: "كل واحد يشيل شيلته يا جماعة.. هنفضل مخدوعين فى ورد لغاية إمتى، كلنا عندنا نموذج ورد اللى لفعها محمد ممدوح على كتفه، نموذج ورد ده بقى كتير أوى فى حياتنا.. العالم اللى بستغلونا لآخر قطرة.. العالم اللى بيمتصوا أرواحنا وطاقتنا.. البشر اللى تديهم صباعك يكلوك كلك مش دراعك بس.. الناس دى عايزة مننا إيه.. رجعوا لكل واحد بلاويه.. متشلوش أتب حد فوق ضهورك، ضهورنا مليانة ومعبية.. وشيلة كل واحد مكفياه.. متسمحوش لحد باستغلالكم تحت مسميات العشم.. استغلالك ده يخصك ميخصنيش".
