«أنت بجد ولا بتهزر!»

وقالت إسعاد: "شوف التفاهة يا أخى رايحين ينتجوا 30 مسلسل بملايين والبلد رايحة فى داهية، مش خسارة الفلوس اللى بتتصرف على المسلسلات كل سنة دى، بالذمة يعنى الفلوس اللى اتصرفت على المسلسلات السنة دى تبنى كام مستشفى، وتصلح كام مدرسة وتربى كام يتيم وتستر كام بنت يتيمة وتبنى كام كمبوند بتلات جناين فوق بعض وتجى كام بوكيمون لواحد تخين مش بيتحرك من مكانه".

أضافت: "لا لا لا خلاص إحنا هنقاطع المسلسلات السنة دى مش هنتفرج وهنخرب بيوتهم، وهنخليهم يشحتوا، ياختاى ده ملخص مجموعة البوستات اللى بتنزل سنويًا فى موسم الدراما الرمضانية، حبة ينزلوا قبل رمضان وحبة ينزلوا فى النص وحبة قرب آخر الشهر، وأنا بجبهم من بيتنا أدخلوا وشوفوهم.. طب بوصوا خلينا عمليين أنا واحدة بتاعت ميديا، وهديكم تجربة عملية، بلاها مسلسلات قفل يابنى عندك يلا مش عملين مسلسلات، يلاه نرش مياه، مبسوط حضرتك كدة؟، العاملة دى يا سيدى قفلت بيوت ما يقرب من 500 عيلة، وبالمناسبة أنا بتكلم عن مسلسل واحد، أضرب بقى فى عدد المسلسلات، أومال فاكر إيه يعنى، لا تكون فاكر أن المسلسل عبارة عن الـ20، 30 ممثل والمخرج والمؤلف والسلام عليكوا على كدة، يا عم ما تقرا البتاع الآخرانى ده، أقل مسلسل مش بيخطى عتبتوا أقل من 500 نفر، وده على فكرة المسلسل الملموم اللى على القد، الـ 500 نفر دول بـ 500 عيلة، وشوف العيلة بقى كام نفر، يلا مش مشكلة يشفولهم صنعة تانية، واللى يتشرد يتشرد".

أوضحت: "ولو مفيش إنتاج يبقى مفيش إعلانات، ويبقى فى استيراد لمسلسلات أجنبية، وتمن المسلسلات دى بدل ما يدخل جيب شركة الإنتاج والموظف والعامل المصرى يروح للمنتج الأجنبى، الدعاية والإعلانات بقى بدل ما تتباع على حس المنتج المصرى تتوزع على حس المنتج الأجنبى، اهو الحمد لله نبقى خسرنا الجلد والسقط، والنبى يا خويا يا حلو أنت يا عنترى يا بتاع المقاطعة، خدتش بالك من كلمة إنتاج يعنى منتج يعنى صناعة يعنى بضاعة مصرية، عملية إنتاج كاملة، شغلت صناع وصنايعية بضاعة مصرية مطلوبة من المحيط إلى الخليج، مش بتاخد دعم من دولة وبتدفع دم قلبها فى الضرايب، بننتجها بقرش وبنبعها إحنا ورزقنا، بضاعة تفرحك الفروض يعنى، لأنها منتج من منتجات بلدك، ومنتج مطلوب ومضمون، وبيتصدر 100%، وتسويقه مضمون وناجح، تكره تشوف إنتاج بلدك ناجح، تكره تشوف مجال شغال فيه ولاد بلدك وبيقبضوا ويفتحوا بيوت، أنت بجد ولا بتهزر! أنت ابن مين ياض أنت ياض".