«ملكات الجمال»
وقالت إسعاد خلال برنامجها "زى مبؤلك كده": "الجمال مش حكر على دولة واحدة، والدليل فنزويلا طلعت 6 ملكات للكون، فى الوقت اللى روسيا ولا مرة عملتها، المسابقة أمريكانى فى الأصل والأساس، مقرها الأساسى كان نيويورك، وانتقل إلى لوس أنجلوس، والفضل فى ده دونالد ترامب، ودة عيب الجمال بقى لما يختلط بالسياسة".
"شعار السينما دايمًا "يا دنيا ما بدالك ماشوفتش غير جمالك"، والسينما المصرية زى النور
ياما جذبت كتير من فراشات الجمال، ليلى فوزى، داليدا، زبيدة ثروت، مريم فخر الدين، إنجى عبدالله، هبة السيسى، داليا البحيرى ملكة جمال بألف وش على الشاشة وبألف دور لجمهور بيعشق التغير".
لارا دبانة
"الواسطة ممكن تكون فى أى حاجة إلا الجمال، لارا دبانة توجت بتاج الجمال لأنها كانت تستحق وسط منافسة شريفة عنيفة، لأنها فعلًا جميلة".
رانيا السيد
"السياسة باب مفتوح للريح، ومع إننا شعب رافعين شعار الباب اللى يجيلك منه الريح سده واستريح، لكن رانيا السيد كان لها رأى مختلف تمامًا، قدمت برامج سياسية واشتغلت ممثلة، عمرها ما قالت أنا ملكة جمال، خلقت لنفسها حدوتة تستحق إننا نسمعها منها وبكل تفاصيلها".
مريم جورج
"المنافسة عندها هواية، أو غواية أن تكون فى أول صف، مريم مش ملكة جمال وخلاص، دى ملكة بدرجة محاربة فى أى مسابقة موجودة، وعلم مصر معاها دايمًا حاضر".
أمينة شلباية
"النجاح صعب والأصعب منه أنك تحول نفسك إلى "براند"، الناس تروحلك فين ما تروح، يبقى إنت الأول والأهم، ده اللى نجحت فيه أمينة شلباية إنها بقت "براند" وعنوان كبير عن الجمال وأى حاجة لها علاقة بالموضة".
سالى شاهين
"صوت معروف له جمهوره لا كان شكلها السبب، ولا جمالها هو العنوان، صوت شق طريقه لقلوب الناس وبقى عنوان للبهجة، سالى ملكة جمال سابًقا، بس هى حاليًا ملكة على الإذاعة".
إنجى عبدالله
"الفشل عمره ما كان نهاية طريق، بالعكس ممكن يكون بداية جديدة، ومشوار لنجاح أكبر، وده اللى عملته إنجى عبدالله، خلقت من فشل البدايات سكة نجاح ومكملة فيها".
نور السمرى
"مش عيب أبدًأ نكون فى المركز الثانى، العيب إنك تشوف نفسك دايمًا الثانى، ادرس، طور أدواتك، عافر، دة اللى عملته نور، من منصب الوصيفة إلى مذيعة حاجزة مكانها ديمًا فى الصف الأول وفى المكان اللى هى شايفة نفسها فيه".
نادين أسامة
"الجمال مالوش سن ولا له شهادة تخرج، طالبة فى ثانوى، طب وإيه المانع؟ لسة فى أولى جامعة، مافيش مشاكل، لأن الجمال مش محسوب بالسنين، محسوب بعدد السنان اللى بابينة فى الضحكة، مسحوب بعدد الأحلام الخضراء جوا القلب، ودة سر جمال نادين ببساطة".
"مسابقة ملكات الجمال بوابة لعالم تانى، ساعات الباب يفتح ويقفل على المسابقة وبس، وتقضى الملكات باقى عمرهم فى حضن زكريات لحظة التتويج".
