الموهوب شمس
وقالت: "فى يوم من الأيام عملوا فريق كورة فى المدرسة، وقرروا يدخلوا مسابقة كأس المدارس نزل الإعلان وكل المدرسة كانت فرحانة وجه يوم الاختبار وكل الناس قدمت".
وأضافت: "كابتن بيبو مدرس الألعاب ابتدى يختار فريق من كل الفصول وكل اللى بيحب يلعب كورة قدم فى الاختبار فى يوم الاختبار اتجمع كل الأطفال فى ملعب المدرسة وهما لابسين لبس رياضة، وكابتن بيبو اداهم كلهم أرقام، وكان ملاحظ إن كل اللى قدموا فى الاختبار طلهم طوال وأجسامهم رياضية تناسب الأبطال".
"بس فى وسط كل دول كان فى ولد صغير وكان جسمه مش باين بينهم كلهم، وغالبا كان اصغر منهم كلهم وكان اسمه شمس، وكلهم ضحكوا عليه وقالوا أكيد كابتن بيبو مش هيختاروا، وشمس كان رقمه أخر رقم فى الاختبار، وكابتن بيبو شاف شمس ومتكلمش خالص، بس كان مستغرب إن شمس ده بعد ما شاف أجسام زمايله الطويلة ممشيش ليه وساب الاختبار".
"فضل كل التلامذة يتنده على اسمهم وكابتن بيبو يقسمهم فرق صغيرة ويلاعبهم عشان يقرر من فيهم هياخد أعلى الدرجات ويقدر يمثل منتخب المدرسة فى كأس المدارس، وبصراحة كلهم كانوا بيلعبوا حلو ومش بطال وكانت المنافسة كبيرة بينهم بس كان ناقص مهاجم شجاع يقدر بسهولة يجرى ويشوط ويدخل أجوان، وجه وقت أخر فريق اللى كان فى وسطهم شمس، اللى مبيتكلمش كتير، وكل فريقه كان خايف منه بسبب صغر سنه وجسمه الصغير ده اللى شكله ضعيف".
و"نزل الفريق وكابتن بيبو صفر صفارة بداية ماتش الاختبار، وكل الفرقة بتاعت شمس كانوا بيلعبوا الكورة لبعضهم، ومحدش كان بيلعب شمس والكورة مكنتش بتروحلوا خالص، وكأنه مش معاهم فى الفريق، بس بالصدفة وقبل ما الماتش يخلص، كانت الكورة خبطت فى رجل لاعب من الفريق المنافس ووصلت لشمس".
"شمس برغم جسمه وسنه الصغير خد الكورة ونططها على رجله كأنه ميسى وابتدى يجرى بيها ويرقص كل اللاعيبة الطوال، ويطلع مهاراته الكبيرة اللى خلت كل اللى جوا الاختبار يسكتوا ويركزوا معاه وهما مستمتعين، وابتدوا يهتفوا باسمه لحد ما وصل الجون وشاط الكورة فى ابعد زاوية تخلى حارس المرمى احتار، شمس دخل أجمال جون طول أيام الاختبار، وهو فرحان وطبعا كابتن بيبو ساعتها عرف بطل سهولة إنه يختار المهاجم اللى هيجيب أكتر وأجمل أهداف فى كأس المدارس".
"اليوم ده خلى كابتن بيبو وكل زمايل شمس الكبار ميحكموش بالنظر بس، ويسيبوا فرصة لأى حد يثبت نفسه ويظهر مهاراته اللى مبتنبانش غير وقت الاختبار ودخل فريق المدرسة كأس المدارس وشمس حصل على ميدالية هداف كأس المدارس وسمع هتافات زمايله وهما بيشجعوه ويشجعوا فريق مدرسته، وهو ماسك كأس المدرسة وبيصور بيه مع فريقه ومن ساعتها الكابتن بيبو فخور بفريق المدرسة وبيساعد شمس فى التدريب عشان يكبر ويفضل احسن لاعب فى المدرسة لحد ما يكبر ويدخل اختبار الفريق اللى بيحبه وهيجيب معاه أجمل الأهداف".
