El Radio 9090 FM
#
حدوتة ملتوتة: زيزو والطيارة

حدوتة ملتوتة: زيزو والطيارة

 

وقالت ماما سناء: "زيزو كان شاطر وبيحب يذاكر كل دروسه لأنه كان بيتمنى لما يكبر يبقى طيار ويلف كل الدنيا ويمشى وسط السحاب وكانت أحلى هدية فى عيد ميلاده إن بابا وماما يجيبولوا طيارة يلعب بيها يوم الإجازة ولأأنه كان شاطر كانوا بيجيبولوا كل أنواع الطيارات".

"بس زيزو كان عنده مشكلة بتخلى بابا وماما يزعلوا منه لأنه كان بيسيب الأوضة بتاعته دايما مش مترتبة، تلاقى الطيارات والألعاب مرميين فى كل حتة فى الأوضة.. بابا وماما وتيتة كلموه كتير عشان يحافظ على الأوضة بتاعته جميلة ونظيفة".

"لكن زيزو كان بيخلى الأوضة بعد يومين أو تلاتة أسوأ من الأول، بصراحة هما احتاروا وخافوا انه يفضل كده لحد ما يكبر، وفى يوم المدرسة بتاعت زيزو عن رحلة للمتفوقين للمطار وهيدخلوا الطيارة من جوة ويسألوا الكابتن عن كل اللى عاوزينه.. طبعا زيزو كان فى غاية السعادة وحس إن دى أفضل هدية ممكن ياخدها وقعد طول اليوم يتخيل إنه راح الرحلة ودخل الطيارة وكمان اتخيل إنه قعد فى غرفة القيادة وطار بالطيارة لفوق وقعد يلف بيها كل الدنيا طبعا دى كلها تخيلات".

"بابا رجع من الشغل وعرف من ماما عن الرحلة فقالها تقول لزيزو إنه زعلان منه عشان الأوضة بتاعته مش مترتبة وإن ممكن يرفض يوديه الرحلة، زيزو طلب من والدته تساعده فى تنضيف الاوضة بتاعته فماما اعتذرت وقالتله انها تعبانة وحاول ترتبها لوحدها".

زيزو حس إن الرحلة هتروح منه فدخل أوضته وقرر أنه يستغل وقت اللعب فى تنضيف اوضته، رتب المكتب واللعب وخد وقت كبير فى الترتيب وجيه وقت المذاكرة لقى نفسه تعب، دخلت عليه مامته وقالتله مش لو كنت تسمع الكلام وتنضفها اول باول مكنش حصلك كده".

"زيزو قال لمامته إنه مش زعلان عشان نضف اوضته لكنه زعلان عشان عرف أد إيه هيا بتتعب فى تنضيف الأوضة واعتذرلها وقالها إنه من النهاردة هينضف أوضته أول بأول، وقالها إنه رغم إنه مش هيروح الرحلة بس هو مش زعلان".

"بابا زيزو قاله إن مسامحه وإنه هيسمحلو يروح الرحلة بس بشرط يلتزم فى تنضيف أوضته ويقدر مجهود الناس عشان يبقى طيار كبير، زيزو نام مبسوط وقعد يحلم بركوب الطيارة، وتوتة توتة خلصت الحدوتة".