حدوتة ملتوتة: البنوتة «نعناعة»

وحكت منصور عن: "العصافير الجميلة اللي كانت بتغنى وتزقزق على شباك نعناعة، وفى يوم من الأيام قبل ما تيجى الرحلة اللى بتروح فيها نعناعة مع باباها ومامتها فيها البحر، قبل الرحلة بكام اليوم قعدت تعيط وهى بتقول لبابا وماما أنا بطنى بتوجعنى، أنا تعبانة".

أضافت: "كل الناس زعلوا عشان نعناعة الجميلة اللى كانت بتغنى وتفرح وتجيب أعلى الدرجات، كل ما حد يزورها تحكيله الدكتور قالها إيه، قالها: يا نعناعة أنتى أكلتى حاجة من الشارع مش نضيفة؟، تقول له لأ ياعمو، قعد يسألها كتير عشان يعرف بطنها الرقيقة الصغنة تعبتها من إيه؛ لحد ما عرف إنها بتنسى تغسل إيديها قبل الأكل وبعده ولما تمسك الفلوس".

تابعت: "قعدت نعناعة زعلانة؛ عشان مش هتروح الرحلة، وكل ما زملاتها يزوروها تحذرهم وكتبت لوحات صغيرة عشان تخليهم ياخدوا بالهم، كل اللوحات كان مكتوب فيها لازم نغسل إيدينا، والمكروبات كائنات صغيرة ممكن تتنقل بسهولة، نعناعة بقت كويسة ورجعت تغنى ووجع البطن راح قبل ميعاد الرحلة مايروح، وبابا وماما كانوا فرحانين بنعناعة، وفرحانين إن صحباتها كمان اتعلموا، ونعناعة راحت البحر وغنت وفرحت".