أسامة كمال: «لو ماسبيرو احتاجنى فى أى وقت مش هتأخر»

وقال كمال: "وزير الإعلام وقتها، فى فترة ما قبل انتخابات الرئاسة فى 2012، حدد مين المذيع اللى هيستضيف المرشحين للرئاسة، ومين اللى هيستضيف المبعدين عن الرئاسة".

وتابع كمال: "رسيت على أن المرحوم طارق حبيب هو من يتولى حلقة مرشحين الرئاسة، وأنا اللى هتولى حلقة المبعدين، وهم عمر سليمان وخيرت الشاطر وحازم أبو أسماعيل، ولو فى ضيف أو اتنين ماحضروش يبقى الفكرة كلها باظت".

وأضاف: "عملت حلقة خيرت، وبعدها حلقة حازم، وكان من المقرر أن الحلقة القادمة مع عمر سليمان، فوجئت قبل الحلقة بيوم بمكالمة من علاء بسيونى، رئيس الفضائيات، بيقولى الوزير بيقولك مافيش، بس كده".

وقال كمال: "أنا عارضت ده، كلمت عصام الأمير مابيردش، علاء بسيونى مابيردش، حتى الوزير مابيردش، ووقتها طلعت وقعدت ساعة على الهواء أعطى درسا فى الإعلام للقائمين عليه فى ماسبيرو، دى مش من هوايتى، بس كان لازم أعمل ده".

وأكمل الإعلامى قائلا: "من اللى قولته على الهواء، قولت للمشاهدين أتوقع إنى ماكونش معاكم الأسبوع اللى جى، قام الوزير هو اللى إدانى الدرس بأنه ماكلمنيش خالص وبالتالى لم أمنع".

ووفقا لكمال: "فوجئت بعلاء بسيونى، طلع فى برنامج تانى فى قناة تانية بيرد عليا، القناة التانية كان فيها ضيوف آخرين استفزوا من كلامه وقالوله إحنا مالنا أنت بتقولنا الكلام ده ليه".

وأكد كمال أن هذا الخلاف ليس سببه اعتذاره عن برنامج "أنا مصر"، وإذا احتاجه ماسبيرو فى أى وقت، لن يتأخر عنه.

برنامج "المانيفستو"، يقدمه الكاتب الصحفى والإعلامى أحمد الطاهرى، ويذاع مرة واحدة أسبوعيًا، على الراديو 9090، يوم الثلاثاء، فى تمام الثانية عشر ظهرا، ولمدة ساعتين.