El Radio 9090 FM
#
«هانيا والأمير»

«هانيا والأمير»

وقالت منصور: "كان يا مكان، كان فيه بنوتة جميلة اسمها هانيا، هانيا بنوتة هادية ورقيقة وجميلة وبتحب الزهور والطيور، وبتحب تلعب فى الجنينة والغابة، وكل الطيور كانت بتحبها، وكلهم كانوا بيلعبوا حواليها يغنوا ويرقصوا ويلعبوا معاها، وفى يوم وهى فى الغابة الدنيا مطرت مطر شديد ورعد وبرق وهانيا مابقتش عارفة تمشى وقررت إنها تستخبى تحت شجرة لحد ما المطرة تخلص وبعد كده تروح، الأمير ابن ملك البلاد كان بيتفسح فى الغابة ومعاه الحرس بتاعه ماشين جنبه طبعا، قربوا من الشجرة، شافوا حركة غريبة ورا الشجرة، كلهم خافوا، افتكروا حيوان مفترس خرجوا أسلحتهم عشان يحموا نفسهم، فجأة لقوا هانيا خارجة من ورا الشجرة.

وأضافت منصور: "والأمير وقف يبص لها وهو مستغرب جدا من شدة جمالها، وقالت لهم "أنتوا مين وعايزين إيه" أمر الأمير حراسه إنهم يشيلوا أسلحتهم وقرب منها وقالها "ماتخافيش ماتخافيش أنا الأمير ابن ملك البلاد إنتى مين" قالت له "أنا هانيا من سكان البلاد وكنت بتفسح هنا وكنت بلعب مع الطيور والزهور والدنيا مطرت عليا فقلت استنى هنا لحد ما تخلص وأروح" وأمر الأمير الحراس إنهم يوصلوها ووعدها إنه هييجى يزورها ويطمن عليها، وصلت هانيا البيت واكتشفت إن جدتها اتوفت زعلت جدا وقعدت تعيط، واحد من الحراس بلغ الأمير فأمر إنها تيجى القصر، وصلت هانيا القصر، وأمر الأمير تانى، إنها تشتغل فى القصر مع الطباخ تساعده يعنى.

وتابعت: "وبعد فترة قرر الأمير إنه يتجوز فطلب من هانيا ماهى بقت صاحبته طلب من هانيا إنها تدورله على عروسة، بقت كل يوم هانيا تجيب للأمير عروسة، هو مش مبسوط ولا عاجبه حد خالص، لحد ما قرر الأمير إنه يتجوز هانيا نفسها، لأنها أكتر واحدة فاهماه وعارفاه، وهو حبها لأنها إنسانة طيبة جدا وهادية وجميلة، راح الأمير يقول للملك إنه عايز يتحوز هانيا، أبوه طبعا غضب جدا منه وقال له "أنت عايز تتجوز خدامة عندنا ابن الملك يتجوز خدامة أنت أكيد اتجننت" بس الأمير كان بيحب هانيا وقال له "بحبها يا جلاله الملك وهى أكتر إنسانة هاعرف أعيش معاها".

واستكملت: "الملك رفض بشدة وأمر الحراس إن هما ياخدوا هانيا يودوها بره البلاد، عند الساحرة الشريرة ويحبسوها هناك وماتخرجش أبدا، الأمير عرف باللى عمله الملك، وقرر إنه يروح يخلص هانيا من الساحرة الشريرة، وصل بيت الساحرة اللى حاولت إنها تمنعه بكل طريقة، لكن هو بكل شجاعة عرف إنه ينتصر عليها، ودخل وحرر هانيا اللى كانت محبوسة فى قفص وسط نار، هو طفى النار وفتح القفص، وأخد هانيا وخرج بيها بره بيت الساحرة الشريرة، ورجع بيها على القصر ووقف بيها قدام أبوه وقال له "يا جلالة الملك أنا هتجوز هانيا ومش عايز أكون أمير ولا حتى ملك وهعيش معاها لوحدينا بعيد عن القصر ده"، أخد الأمير هانيا وسكنوا فى بيت وسط البلاد وبقى بيشتغل ومبسوط جدا مع هانيا اللى اختارها عشان هى طيبة وجميلة وبتحبه.