«الصيادين والعقد التلاتة»

وقالت سناء: "كان يا مكان كان فيه جزيرة كبيرة أهلها ناس طيبين وكلهم بيحبوا بعض الفلاحين بيزرعوا ويوزعوا خير الزرع على أهل  الجزيرة وكل واحد صاحب شغل أو مهنة بيعمل كده هو كمان يعنى اللى عنده لحمة اللى بيبيع لبن واللى بيبيع فراخ حتى الصيادين كانوا كل يوم الصبح بيخرجوا فى رحلات صيد وبيرجعوا يوزعوا السمك على أهل الجزيرة".

وأضافت "فى يوم خرج صيادين الجزيرة للصيد واصطادوا سمك كتير وهما راجعين كان فيه رياح شديدة وهوا جامد اوي مكنش مخلى المركب عارفة تمشى فى البحر فقرروا إنهم يستنوا عند أقرب جزيرة يقابلوها لحد الرياح ما تهدى ويعرفوا يرجعوا لجزيرتهم تانى وصلوا لأقرب جزيرة ونزلوا من المركب يدور على مكان يقعدوا فيه لقوا كوخ صغير وجواه كان عايش راجل عجوز لوحده استأذن الصيادين من العجوز إنهم يقعدوا فى الكوخ لحد ما الرياح تهدى ويعرفوا يكملوا رحلتهم، وافق الراجل العجوز واستضافهم فى الكوخ".

وتابعت "سأل الراجل العجوز الصيادين وقالهم أنتوا مين يا ولاد.. قاله واحد من الصيادين إحنا صيادين وكنا بنصطاد وإحنا راجعيين هبت رياح شديدة ومعرفناش نكمل فقولنا نستنى هنا وبعد كده نكمل.. وقعد العجوز وسطهم وقال طيب أنا هساعدكم عشان تعرفوا ترجعوا تانى للجزيرة بس بشرط إنكوا تنفذوا اللى هقولكم عليه.. الصيادين فرحوا ووعدوه إنهم هيسمعوا كلامه قام الراجل العجوز جاب حبل معقود 3 عقد وقالهم الحبل ده فيه 3 عقد أول ما تتحركوا بالمركب فكوا العقدة الأولى هتيجى رياح تنقلوا بعيد من الجزيرة وتقربكم من جزيرتكم.. وأنتوا فى نص الطريق فكوا العقدة التانية هتيجى رياح توصلكم لحد الجزيرة".

واستكملت "سأله واحد من الصيادين وقال الله طب والعقد التالتة فابتسم العجوز وقال كتفكوهاش غير وإنتوا على أرض الجزيرة وتكونوا نزلتوا من المركب.. تانى يوم الصبح استعد الصيادين علشان يتحركوا بالمركب وسلموا على العجوز مع السلامة يا راجل يا طيب ومتشكرين على استضافتك الطيبة دى.. والعجوز قال متنسوش يا ولاد العقد التلاتة زى ما قولتلكم.. الصيادين سلموا عليه ومشيوا ركبوا مركبهم وبدأوا يتحركوا في الميه فكوا أول عقد فجت رياح خفيفة نقلت المركب بسرعة لوسط البحر وقطعت بيهم نص المسافة تقريبا.. وبعدين فكوا العقدة التانية فجت رياح تانية أقوى شوية وصلتهم للشاطئ أول ما وصلوا جزيرتهم قرر واحد من الصيادين إنه يفك العقدة التالتة فشافه واحد منهم وقاله لأ متفكهاش الراجل العجوز قالنا بعد ما ننزل من المركب".

وقالت "لكن الصياد تجاهل الكلام تماما وفك العقدة التالتة.. فهبت رياح شديدة جدا وخدت المركب تانى للبحر وبقى الصيادين كلهم بيحاولوا ينطوا من المركب لأنهم حسوا أنها هتغرق.. قاعدوا يحاولوا يعوموا علشان يوصلوا للشط وينقذوا نفسهم من الغرق فضلوا كده طول الليل لحد ما الرياح هديت وعرفوا يوصلوا لأرض الجزيرة.. ووقف الصياد اللى حذرهم من فك العقدة التالة وقالهم كل ده حصل عشان إنتوا مسمعتوش النصيحة ولا وفيتوا بوعدكم مع الراجل العجوز.. طبعا الصيادين فهموا إيه اللى حصل وأنهم كان لازم يسمعوا كلام الراجل العجوز لأنه أكبر منهم وأكتر منهم خبرة وحكمة وأنه كان لازم يستفيدوا من ده".