El Radio 9090 FM
#
زى مبقولك كده: الغارمين

زى مبقولك كده: الغارمين

قالت إسعاد: "من كلاسيكيات الحبكة الدرامية فى السينما والمسلسلات المصرية فكرة أن الشرير اللى فى الفيلم يبقى ماسك على بطل الفيلم أو بطلته كمبيالات فلوس مضاهم عليها بطرقة ما، وبيهددهم أنه لو مبقاش شرير زيه هيعمل ويسوى فيه ودايما بنتعاطف مع البطل اللى بيحل المشكلة، الحبكة دى عشان تبقى حلوة لازم المبلغ يبقى كتير ومجعلص أوى أوى عشان البطل يبقى حاسس أنه هيروح فى داهية أوى ويحس أنه مش قادر يسدد، لكن مش ممكن نعمل فى فيلم أن البطل مديون 200 جنيه ولا حتى 5 آلاف جنيه، الدراما كده تبقى صايصة، لكن لما نيجى بقى للواقع وعلى الأرض بحق وحقيقى، فى مشكلة كبيرة أوى ممكن تكون ملفتتش نظرك أو لفتت نظركِ ومخدتش تفكير منك كبير وهى قضية الغارمين".

 

وأضافت: "الغارمين دى كلمة المقصود بيها كل من عليه دين ولا يستطيع سداده، يعنى المديون العاجز عن السداد، الغارمين دول هما فئة من الـ8 فئات اللى الدين قال ينفع ياخدوا فلوس الزكاة زيهم زى الفقرا، بس الموضوع بقى مش متساب كده لأن لازم الدين مش بسبب ترفيهى أو فشخرة وكمان يكون فى عجز عن السداد، يعنى الراجل مش قادر يسدد، يعنى مرض أو ظروف مش مش قادر يسدد عشان مكسل أو ملوش مزاج".

 

"تقولى بقى مهو الموضوع سهل أهو طالما المبالغ قليلة، مأهل الخير كتير ويساعدوا، أقولك أيوه طبعا، بس الموضوع فيه لمؤاخذة مزنق صغنن كده، عدد اللى بيدخلوا السجن فى المبالغ الصغيرة دى كبيرة أوى، كبير جدا، كبير أوى أوى مش قليل، وأقولك كمان أن النسبة الأكبر منهم ستات، والأكتر فى الستات هما الستات المعيلة يعنى اللى تصرف على أسرة".

 

وأردفت الإعلامية قائلة: "الموضوع كمان فيه مغرز تانى إن القانون بيقول أن لو الدين كمبيالة مش كون الفلوس معاك وتقدر تسددها خلاص، لا، ده لازم تسددها لصاحب القضية ويتنازل عشان تخرج من السجن، يعنى الشر بره وبعيد عن السامعين فتبص تلاقى وحدة ست جابت غسالة عادية بالقسط ومضت على كمبيالات وتعثرت فى السداد تقوم داخلة السجن على كام؟ على ألف جنيه، عشان تخرجها بقى مش بس تجيب الألف جنيه، لا كمان تدور على صاحب الكمبيالة عشان ياخد فلوسه ويتنازل".

 

وتابعت: "مؤسسة مصر الخير بقى هما الناس اللى مهتمين بالغارمين والغارمات ومخصيين مشروع عندهم للقضية دى، والحلو أنهم بيشتغلوا على القضية دى بتركيز شديد، يعنى بيدرسوا الحالة، ويدوروا ويروحوا ويجوا لحد ميقدروا يحطوا الفلوس الصح فى المكان الصح للشخص الصح، وعشان كده لحد النهاردة فى أكتر من 40 ألف غارم وغارمة قدروا أنهم يحلوا مشاكلهم ويوفقوا أوضاعهم".

 

واختتمت حديثها قائلة: "الموضوع كبير وهنتكلم فيه كتير، لأن فى أكتر من جزئية يعنى جزء مثلا ليه علاقة بالقانون، وجزء ليه علاقة بإزاى نلحق الناس دى قبل متخش السجن، وجزء ليه علاقة بأنه لو خرج من السجن ومقدرناش نقف جمبه ممكن يرجع تانى، عموما كلامنا مخلصش، إحنا نقدر على كل مشاكلنا ونقف جمب بعض، وهتبقى بلادنا أحلى والله العظيم أحلى".