زى مبقولك كده : «بقعة بطالة»

قالت إسعاد: "وأنا بحكى لكم عن مصنع الكوفرتا والشال اللى فى المنيا اللى شغال على فكرة تأهيل السجينات وتعلمهم حرفة لحين فك كربهم، وكمان توفير مصدر دخل ليهم أثناء فترة العقوبة، نط فى عقل بالى مشكلة تانية، أنا بقى عندى هسهس بالغارمات، بجد زى مبؤلكم كده جالى الهسهس، طب اللى وقع المحظور ودخلوا السجن فعلا تم تأهيلهم وربنا أكرمهم، طب اللى اتفك كربها ولا دخلتش السجن، ودول بقى أعدادهم أكبر من اللى فى السجون ما بين قضايا متداولة أو محجوزة للحكم، أو حتى قبل متتحول المشكلة لقضية، دول يعملوا إيه؟ يفضلوا زى مهما كده لا شغلانة ولا صنعة ولا حاجة تسد عوزتهم".

وأضافت: "أرفع التليفون وأسأل ألو يا جماعة.. بالنسبة للى مدخلوش السجن أو اللى دخلوا السجن بس مش فى المنيا، ما سجون النسا فى كل حتة يعنى، أو اللى دخلوا وخرجوا، هيعملوا إيه؟ هترجع ريما لعادتها القديمة وأبوك عند أخوك ويتداينوا تانى وقواضى تانى وندور نجبلهم فلوس نفك كربهم تانى؟ منين؟ مهو ده شىء يطول شرحه والله، الناس قالولى الحقيقة يعنى فى من 3 سنين مصنع تم إنشاؤه للسجاد اليدوى، كمان ده مش مصنع واحد دول 3 مصانع، تم إنشاؤهم على مدار الـ3 سنين اللى فاتوا، اللى أنشأتهم مصر الخير، والـ3 مصانع دول قايمين على تدريب وتشغيل الغارمات وده لتوفير مصادر دخل وتعلمهم مهارة وبتدر لهم ربح، حاجة لوز أوى، سألت طب واشمعنا السجاد اليدوى؟ قالولى أكمن يا ستى صناعة السجاد أهم عامل فيها هو العامل البشرى فبتحتاج ناس كتير تشتغل".

وأردفت قائلة: "قالك السجادة الواحدة على الأقل بتحتاج 3 أفراد يشتغلوا فيها، والفترة من 3 أشهر لحد سنة كاملة، أه والله زى مبؤلكم كده محنا عارفين الكلام ده، هو السجاد اليدوى يعنى غريب علينا، وهو غالى من شوية، طبعا ارتفاع سعر السجاد اليدوى بيحقق دخل معقول جدا للمصانع، اللى كمان بدورها بتصرف على العاملات، والله حاجة عظيمة، لا وكمان بيقولك أن المصنع ده من أكبر 3 مصانع للسجاد اليدوى فى مصر كلها وساهم فى إعادة إحياء الصناعة التراثية الجميلة دى، وفتحلها أسواق داخلية وخارجية كبيرة جدا والله مصلحة، لا وكمان إنشاؤه فى منطقة أبيس الريفية فى إسكندرية ساهم فى رفع كفاءة المنطقة ورفع مستوى المعيشة، واتحولت لقرية منتجة بعد ما كنت مشكلة للدولة كونها يعنى بقعة بطالة وأزمات مجتمعية طول الوقت".

وختمت الإعلامية قائلة: "ده غير أن المصنع ومع الأعداد الضخمة اللى شغالة فيه بيوفر خدمات صحية متكاملة للعائلات وأسرهم، وبيوفر كمان محو أمية للعاملات واستشارات نفسية وأسرية يا حلولى ده حاجة حلوة أوى حضرتك، يعنى أنمى الناس وأحيى صناعة تاريخية وأحل مشكلة مجتمعية وأدخل عملة صعبة وحاجة آخر يا سلام يا سلام يعنى، الموضوع مدهش لدرجة تخلى الواحد ينتشى كده، بؤس فكرة الغارمات دى ممكن الواحد معاها ميصدقش أن ممكن من وراها تطلع حاجة منورة كده، تحية للناس اللى بتفكر طول الوقت خارج الصندوق، الناس اللى بتبدع فى الأفكار عشان تحل المشاكل، وتحية أكبر لكل المساهمين فى الخير فى المجتمع الكبير ده سواء بوقتهم أو جهدهم أو مالهم".