«العلم نور»زى مبقولك كده:
وقالت يونس، خلال برنامج "زى مبؤلك كده": "كلنا عارفين حكاية الراجل العجوز اللى كان بيحط بذرة شجرة فى الأرض، عدى عليه واحد شاب قاله يابا الحاج، ربنا يديك الصحة وطولة العمر، بس يعنى متأخذنيش، البذرة دى على بال ما تكبر وتبقى شجرة وتطرح ثمار، عايزة لها سنين يعنى.. الشاب كان يقصد إن الراجل العجوز ده مش هيعيش لحد ما يشوف الشجرة، طبعا الأعمار بيد الله، بس برضه ربنا عرفوه بالعقل، فالشاب بيسأل إيه فايدة أنك تعمل حاجة مش هتستفيد أنت منها؟ عارفين إجابة الراجل كانت إيه، إننا لو بنفكر بالمنطق ده مش هنعمل حاجة خالص، طول ما أنت عايش وفيك نفس واجب عليك تعمل حاجات مفيدة، للكل، ليك ولللى جاى بعدك، واللى عايش معاك، والراجل نفسه ياما استفاد من حاجات عملوها ناس قبله، أو ناس تانيين ميعرفهمش خالص، هى دى الدنيا".
وتابعت: "اللى عايزة أقوله لكم النهاردة، إن الفكرة دى مش بس فى زرع الشجرة، حاجات كتير أوى فى حياتنا مالهاش سن معين نجى عنده ونقول خلاص شطبنا، ويالا حسن الختام والكلام ده، ومن أكتر الحاجات اللى نفسى نعرف أنها مش مرتبطة بسن هى التعليم ياعم أو التعلم أو العلام بالبلدى، آه والله زىمبؤلك كده.. وإذا كان أهالينا زمان قالوا بعد ما شاب ودوه الكتاب، فده مثل قديم مش عايزينه وياريت اللى سمعه يشطبه من حياته واللى مسمعوش ولا كأنه سمعه".
وواصلت حديثها لتقول: "التعليم عندنا عادة بيبقى مرتبط بفكرة الشهادة، مع أن الهدف الأول للعلام هو العلام نفسه، مش بيقولوا العلم نور، وعلى رأى مسرحية فؤاد المهندس "العلم نورن"، فالبنى آدم مننا طول ما هو عايش محتاج يعرف أكتر عن حاجات أكتر، عيب أوى لو لقيت فرصة إنى أتعلم لغة مثلا وعندى الظروف المواتية، فيبقى المانع إنى كبرت وعديت التلاتين أو الأربعين، لأ خلاص يا أخى إحنا مبنكبرش أساسا عن الأربعين أصلا، أنت هتحرق دمنا ليه؟ مش لازم أوصل فيها لأعلى حاجة ومش لازم أتكلمها، كأحد أبنائها يعنى ومش لازم أشتغل مترجمة فورية محترفة، كفاية أوى أنى أبقى عارفة الأساسيات بتاعتها".
واكدت إسعاد: "ممكن أخد مثلا كورس فى التسويق، الكورس مش بس بيع السلع وعالم الشركات، كلنا محتاجين نسوق نفسنا وشغلنا وأفكارنا، ومحتاجين نتعلم أساسيات التسويق اللى بيبقى فيها جوانب نفسية واجتماعية مفيدة، كمان هاخد فكرة يا أخى عن عالم الاقتصاد بالمرة، حاجة لطيفة، خد مثلا اللغات والتسويق، وقيس بقى على أى حاجة تانية، مزيكا، طبيخ، تريكو فك، وتركيب حاجة، كمبيوتر كهربا أى حاجة، مفيش حاجة النفر مننا بيتعلمها من غير ما توسع مداركه، وتطور شخصيته، مش بس فى الحاجة اللى بيتعلمها ده فى الحياة عموما، وهتكون مفيدة ليه وللكل عموما.أنا عارفة أن كتير مننا مشغول لشوشته فى حاجات البيت والعيال والأسرة والطفل والكلام ده، لكن برضه عندنا أوقات كتير بتضيع فى اللاشىء والبالالا، وعندنا كمان قلة تقدير للعلام".
