وقالت ماما سناء "كان يا ماكان فى غابة من الغابات كان فى قطة جميلة اسمها بسبوسة، وكانت تقعد كل مراية تبص لنفسها  وتسأل نفسها هى حلوة واللا مش حلوة، وكانت بتبص لكل الحيوانات وكل مرة تحلم تكون حيوان مختلف، مرة تحلم تبقى سمكة واللا طاووس".

وأضافت "بسبوسة وهى ماشية شافت بطة فى الميه، قالت الله البطة دى حلوة اوى، أنا عاوزة أبقى بطة، نزلت البحيرة راح البط رفض وخرجوها بره الميه.. مشيت فى الغابة شافت جنينة فيها فاكهة شكلها حلو وجميل، فاتبسطت اوى وقالت انا هبقى زهرة شكلها حلو وليها ريحة حلوة.. راحت جابت شوية زرع على راسها زى الورد، وفجأة شافت مجموعة من الخرفان عاوزة تاكل الزرع الللى على راسها، راحت هربت".

وتابعت "شافت أرنب بيجرى وبينط بسرعة وبياكل جزر، عجبتها طريقة الأرنب، قالت خلاص أنا هبقى أرنب.. جريت بسبوسة زى الأرنب وكانت بتنط زيه لغاية ما خبطت فى شجرة ووقعت جنب تعبان، راح فتح بقه وكان هياكلها لكنا جريت وقالت الحمدلله انى قطة وبعرف أجرى بسرعة وإلا كان التعبان زمانه كلنى، ورجعت تانى للبيت بسبوسة وكمان مبسوطة، وتوة توتة خلصت الحدوتة".