El Radio 9090 FM
#
«فتى الشاشة الأول»

«فتى الشاشة الأول»

وقالت إسعاد يونس خلال برنامج "زى مبؤلك كدة": "فتى الشاشة الأول، ده لقب كان منفرد به شخص واحد بس، وأطلق عليه  لوحده، أول من أطلق عليه اللقب ده وأكتر واحد لايق عليه، هو المبدع أنور وجدى، الراجل ده حدوتة كبيرة أوى يا جماعة تتعمل حكايته مسلسل 400 حلقة".

 

وأضافت إسعاد: "أنور وجدى راجل أبدع فى الـ50 سنة اللى عاشها فى الدنيا، مثل فى 8 من أهم 100 فيلم فى السينما المصرية، أنتجها وكانت أفلام نقلات فى الفن السابع، اكتشف أهم نجوم فترة الأربعينيات، والخمسينيات، أخرج وألف ولعب مزيكا".

 

وأكدت: "أبو الأنوار لما كان يبتدى فيلم، يجيب الممثلين اللى فى الفيلم كلهم، ويلبسوا هدوم الفيلم اللى هو صممها، ويعمل ديكور لمشهد من مشاهد الفيلم ويصور كل الممثلين فى الديكور ده ويعمل ألبوم فوتوجرافى، ويأخد الصور الأقطار العربية ويسوق للأفلام من قبل تصويرها علشان يعرف مبيعاته هاتكون إزاى، الموزعين بيشوفوا ألبوم الصور يتوهموا يحبوا الفيلم ياخد منهم عرابين ويرجع محمل بثمن الفيلم ومكسبه، شوف الدماغ".

 

وتابعت: "كل ده كوم وحياته الشخصية كوم، الراجل ده دعا بالغنا والمرض فى ساعة استجابة، فتحقق مناه ويجمع ثروة أكثر من نص مليون جنيه فى زمن كان صاحب الجنية ملك، وبعد الفقر والجوع الحرفى اللى شافه، البلية تلعب بس المرض ماسبهوش فى حاله، وأصيب بسرطان الأمعاء واتحرم متع الدنيا رغم الغنا، وأصبح ساندوتش الطعمية كل أمل أنور وجدى".

 

وأوضحت: "الحكاية دى وقفتنى أمام معنى عميق جدًا، لو كل اللى اتمنيناه فى وقت من الأوقات تحقق هانكون سعداء؟ يعنى الحاجات اللى هانموت عليها ومابتحصلش، الشغلانات اللى اتقدمنالها، العلاقات الكتير اللى ابتدت حلوة واتمنينا نعيشها لآخر ثانية وفكست بسبب أو من غير، الأفلام اللى مادخلناهاش الأغانى اللى ماسمعناهاش، الفرص اللى اتمنيناها وماجتش، وكل الحاجات اللى ندمنا عليها وزعلنا، كانت تستاهل بجد؟، طيب لو كانت جت كنا هانستمتع بها؟ مش كل اللى بنتمناه بيكون أحسن حاجة لينا، ياما تمنينا حاجات والقدر اختارلنا عكسها تمامًا، ونغضب ونزعل، وتعدى الأيام ونكتشف أن أحسن حاجة حصلت لنا هى أكتر حاجة كان نفسنا ماتحصلش".

 

اختتمت: "لازم نسعى فى الدنيا بس النجاح مش بتاعنا، نجاحنا خير وبركة ونستمتع مجهودنا، مانجحناش وماله دى مش آخر الدنيا واكتسبنا خبرة على الأقل، ماحدش عارف الخير فين، ربنا هو اللى بيحدد".