فايق: كفاية على إيناسيو كده

طالب الإعلامى إبراهيم فايق، حلًا لأزمة إيناسيو، المدير الفنى للزمالك، الذى يقدم مستوى سيئا مع الأبيض بعد الخروج من دورى أبطال إفريقيا.

وأوضح فايق، فى برنامجه "ملعب 9090"، على الراديو 9090: "اللى خلى تصريحات إيناسيو توصل لهذه الحدة، ده بسبب تصريحات إدارة النادى ضد البرتغالى، كلام عنيف من مجلس الإدارة بعد الخروج من دورى أبطال إفريقيا، وبعدها نتائج الفريق أصبحت فى سوء". 

وتابع: "المدرب تحسه قاعد غلاسة وعند فى الفريق لغاية ما يمشوه، المشهد كله على بعضه غريب، وفى النهاية ما بنى على باطل فهو باطل". 

وأضاف: "مجلس الإدارة مش عايز يمشى المدير عشان الاستقرار بس للأسف بيهاجمه وبيبيع ويشترى لاعبين بمزاجه، واللى بيحصل ميخليش الفرقة تتقدم، فيه مدير فنى مش مقتنع بقدرات اللاعبين، ولا عارف حاجة فى الفريق". 

وواصل: "كفاية كده، مشوا إيناسيو وخلينا نخلص، ومسكوا الكابتن طارق يحيى الإدارة الفنية، فى نهاية موسم وبداية موسم جديد، لأن العملية باخت ورخمت خالص، علاقة من طرف عاشر".

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع من الأحد إلى الثلاثاء، فى تمام العاشرة صباحًا.