مناحى الحياة

تحدثت الإعلامية إسعاد يونس فى برنامجها "زى مبؤلك كده" المذاع على "الراديو 9090" عن برنامج " مناحى الحياة".

وقالت إسعاد: "أكيد فى تنمية الإنسان أساسى جدًا أنك تفك كربه لو مديون، أنك توفر له شغل لو عاطل، أنك توفر له علاج لو كان مريض، أكل لو جعان، كسا لو محتاج، سكن آدمى لو مشرد وعايش فى مكان مينفعش يعيش فيه بشكل إنسانى كريم، مياه صرف صحى كهرباء كل مسببات الحياة مهمة لتنمية الإنسان، بس تنميته شرب وعلاج وسكن وكسوة وفك كرب الإنسان الكيان الضخم المعقد اللى مليان دواير متقاطعة، دواير اجتماعية ونفسية وصحية وبيئية، الكون كله مختصر جوه البنى آدم، فأكيد لما نتكلم عن تنمية الإنسان لازم يبقى المعنى أشمل وأعمق بكتير، هنا بقى بيجى دور برنامج مناحى الحياة". 

وأضافت: "البرنامج ده بيهدف لبناء وتنمية الإنسان من خلال الأنشطة الثقافية والفنية والرياضية ومهارات الحياة اليومية والمهنية، المهارات الحياتية خلى بالك، رؤيتهم هى الارتقاء بالسلوك والقيم والأخلاق وبناء القدرات والثقة بالذات علشان يرفعوا الحياة ويحققوا الكرامة الإنسانية للفرد فى المجتمع، كلام جميل، بس إزاى، قالك يا سيدى تشتغلوا على كذا محور، مثلًا عملوا على تكين ذوى الإعاقة، دعموا مثلًا أوركسترا النور والأمل لحد ما وصلت للتمثيل الدولى لمصر وأنشأوا 4 مراكز تأهيلية لذوى الإعاقة لدمجهم فى المجتمع، وتذليل العقبات التى تواجههم للتعامل مع المحيط بتاعهم".

وأوضحت: "اشتغلوا كمان على تدريب ذوى الإعاقة ومساعدتهم على الالتحاق بمهن ووظايف تناسب حالاتهم بحيث يكون أفراد منتجين ومشتغلين ومش محتاجين للسؤال، دعموا كمان الأولمبيادات الخاصة بالمعاقين، دعموا كما الجمعيات المهتمة بالمعاقين زى جمعية الحق فى الحياة وجمعية أنقياء القلب، محور كمان اشتغلوا عليه، وهو محور بناء الشخصية المصرية وده بقى من خلال كذا برنامج، منهم مثلًا يا سيدى مشروع ايه؟ أنا كبرت، أنا كبرت ده بيشتغل على الإخصائيين النفسيين والنشطاء الاجتماعيين ويهدف إلى رفع كفاءتهم للتعامل مع المراهقين، البرنامج شغال على طلبة مدارس ثانوى والإعدادى لأكثر من 60 مدرسة فى القاهرة والجيزة وأسيوط، مشروع الوعى الصحى لطلاب مدارس الصعيد ويهدفوا للمشروع ده لرفع مستوى الوعى الصحى لطلاب مدارس الصعيد وضواحيهم، أكاديمية مصر الخير ودى بقى بتشتغل على تأهيل المتدربين لسوق العمل، من خلال رفع كفاءتهم وقدرتهم على العطاء والإنتاج".

وتابعت: "محور تانى كمان اشتغلوا عليه وهو نشر الثقافة والفنون، يا سلام ده يعجبنى أوى، واشتغلوا فى كذا مشروع تحت المحور ده، منها مثلًا مشروع المكتبات المتنقلة، يا سلام على جماله، وده فى الأماكن اللى مفيهاش مكتبات عامة والأماكن اللى فيها مكتبات قاموا بدعم المكتبات الموجودة فى المدارس والنوادى ومراز الشباب، يعنى تخيل منطقة كدة مفيهاش مكتبة خالص تلاقى مكتبة متنقلة جيالك لحد عندك، مشروع كمان اشتغلوا عليه، وهو توثيق ثقافة جنوب البحر الأحمر وده من خلال الأفلام الوثائقية وتوثيق حكايات الأهالى التراثية، اشتغلوا كمان على القضاء على ظاهرة القمامة فى القاهرة ووفروا فى السبيل ده حوالى 400 صندوق حديد لجمع القمامة والتخلص منها كنواة يعنى، فكرة دعم الكم المهول ده من المشاريع، حاجة فوق طاقة شركات ومؤسسات وحكومات كمان، ومع ذلك الإيمان بأهمية عملهم بيستمروا فى طريقهم".