فايق: نور الدين «غلطان».. والاتحاد العربى أونطجى

شن الإعلامى إبراهيم فايق، هجوما عنيفا على منظمى البطولة العربية، التى انتهت بشغب الجماهير، بعد تحطيم مقاعد مدرجات استاد الإسكندرية من قبل مجموعة من مشجعى الفيصلى الأردنى، اعتراضا على هزيمة فريقهم من الترجى التونسى، بثلاثة أهداف مقابل هدفين.

وأوضح فايق، فى برنامجه "ملعب 9090"، على الراديو 9090: "مفيش أى مشكلة مين يكسب فى البطولة العربية، معنديش أى مشكلة خالص من الشعارات البوهيمية بتاعت لم الشمل والكلام ده، لكن بطولة مالهاش أى لازمة فحضرتك تيجى تقل أدبك وهنسيبك، ينضرب حكم وتتكسر كراسى فى استاد بفلوس البلد".

وتابع: "مينفعش خالص أطبق القانون على أهل بلدى، وحضرتك تفكر أنك تيجى تكسر وتمشى من المطار عادى، وما حدث من الفيصلى الأردنى يستحق الاعتذار الرسمى، ارجعوا وشوفوا الفيديوهات، أنا بلوم على الكابتن إبراهيم نور الدين أنه انضرب ولم يلغ المباراة، انضرب ومرة واتنين وابتسم". 

وأضاف: "فى الأول وفى الآخر البطولة العربية ودية وما لهاش أى لازمة، ومش هتوصلنا لكأس العالم يعنى، ليه يا كابتن إبراهيم نور الدين ملغتش المباراة، ليه تسمح المواجهة توصل لهذا الحد". 

واستطرد: "إيه التنظيم السيئ ده، أنت جيت هنا فى بلدى لازم تحترمنى، إحنا هنا فى مصر بنقابل كل الضيوف بترحاب شديد، فغير مقبول ما حدث، طيب الاتحاد الأردنى لغاية دلوقتى مش شايف أن اللى حصل ده عيب وميصحش، مفيش أى تعليق منهم، طب إزاى".

وواصل: "على حسب معلوماتى، فى 40 من جمهور الفيصلى محتجزين فى قسم باب شرق، لازم تدفعوا فلوس تلفيات الاستاد، وهيطبق عليهم القانون زيهم زى المصريين، ومينفعش ألم شمل العرب فى بطولة زى دى، وفى الآخر يحصل اللى حصل، أهلا وسهلا يا سيدى".

واختتم: "لو الاتحاد العربى مخدش أى قرار ضد التجاوزات اللى حصلت، يبقى هو اتحاد أونطجى، اتحاد مالوش لازمة، يبقى اتحاد لم يوفى باللى قال عليه، يبقى اتحاد بيضحك علينا، وأنا مش بحب حد يضحك علينا". 

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع من الأحد إلى الثلاثاء، فى تمام العاشرة صباحًا.