الشجرة النونو والشمس
روت الإعلامية سناء منصور فى "حدوتة ملتوتة"، المذاع عبر موجات الراديو 9090، اليوم الأربعاء، حدوتة "الشجرة والشمس".
"كان ياما كان.. كان فيه شجرة كبيرة أوى.. وعندها شجرة نونو بنتها، الشجرة النونو كانت بتحب مامتها الشجرة الكبيرة أوى أوى أوى.. وكانت متعلقة بيها جدا جدا.. وكانت دايما تقول لمامتها الشجرة الكبيرة: أنا بكرة لما أكبر هضلل عليكى بفروعى يا ماما زى ما أنتى بتضللى عليا كده وبتحمينى من الشمس الوحشة اللى بتنشف أوراقى.
الشجرة الكبيرة: ربنا يخليكى ليا يا شجورة يا نونو.. وعلى فكرة الشمس مش وحشة ولا حاجة.. الشمس جميلة وهى اللى بتمدنا بكل الطاقة اللى محتاجينها، وإحنا من غيرها مانعرفش نعيش.. الشمس بتنشف الأوراق الضعيفة بس اللى إحنا مش محتاجينها، وكمان علشان تدى فرصة للأوراق النونو إنها تكبر وتخضر.
الشجرة النونو كانت أول لما تشوف الشمس تستخبى فى مامتها الشجرة الكبيرة.. الشمس شافت الشجرة النونو وهى مستخبية فى مامتها وسمعتها وهى بتقول عليها الشمس الوحشة جت.. راحت للشجرة النونو وقالت لها: تقدرى تقوليلى دلوقتى أنتى شايفانى وحشة ليه يا شجرة يا نونو؟
الشجرة النونو: عشان أنتى بتنشفى أوراقى وبتخلينى أبقى وحشة.
الشمس: من غيرى أنتى مش هتبقى موجودة يا شجرة يا نونو وهتتبهدلى وهتموتى من البرد.
الشجرة النونو: لا أنا هقدر أعيش من غيرك ومش هيحصل لى حاجة.. بالعكس هحتفظ بكل أوراقى ومافيش ولا ورقة هتتبهدل أو تنشف وهفضل جميلة طول العمر.
الشمس سابت الشجرة النونو ومشيت وهى بتقول لنفسها: معلش.. بكرة تكبرى يا شجرة يا نونو.. وتعرفى إن وجودى مهم ليكى ولكل الشجر والمخلوقات ع الأرض.
وفى يوم كان شتا ومطر وغيوم كتيرة.. كانت مخبية الشمس اللى ماعرفتش تشوف الشجر.. وقفت الشجرة الكبيرة تدعى ربنا وتقول: يا رب الغيوم دى تروح بقى والشمس تخرج عشان هنموت من البرد والمطر.
الشجرة النونو: يا ماما كده أحسن يا ماما.. أنا بحب البرد والمطر ومش بحب الشمس.
الشجرة الكبيرة: لو الشمس فضلت كده مخبياها الغيوم هنموت من البرد والمطر.. إنتى صغيرة ومش عارفة حاجة.
وكل ساعة تعدى والشمس مش موجودة، كانت الشجرة الكبيرة تحس بالخوف وتحاول تخبى الشجرة النونو من البرد والمطر، فبدأت الشجرة النونو تترعش من البرد.. وبدأت أوراقها تدبل وتصفر وقالت لمامتها: أنا خايفة أوى يا ماما.
الشجرة الكبيرة: ماتخافيش يا حبيبتى.. دلوقتى الشمس تطلع وكل المطر والبرد ده هيخاف وهيهرب ويمشى من هنا.
وفضلت الشمس غايبة يومين، والشجرة الكبيرة مش عارفة تعمل إيه وهى شايفة الشجرة النونو كل يوم بتضعف عن اليوم اللى قبله.. فضلت الشجرة الكبيرة تدعى ربنا إن الشمس تخرج عشان بنتها الشجرة النونو هتموت من البرد.. لحد ما خرجت الشمس فعلا وطردت كل الغيوم والبرد والمطر.
وقفت الشجرة الكبيرة فرحانة موت.. فرحانة بالشمس.. وفضلت تغنى مع باقى الشجر فى الجنينة.. وقالت لبنتها الشجرة النونو: شوفتى بقى أهمية الشمس وإننا من غيرها ممكن نموت
الشجرة النونو: أيوه يا ماما.. كان عند حق فعلا.. إحنا مانقدرش نعيش من غير الشمس.. وكنت مش عارفة أهمية وجودها"
