مختار مختار: بيسيرو خد فرصته.. وما لوش حجة

أوضح مختار مختار، المدير الفنى السابق للمصرى البورسعيدى، أن فترة السماح للبرتغالى جوزيه بيسيرو، المدير الفنى للأهلى، انتهت.

وقال مختار، للإعلامى إبراهيم فايق، ببرنامجه "ملعب 9090"، على الراديو 9090: "بيسيرو غير موفق لغاية دلوقتى فى الأهلى، وده باين فى النتائج، ونتمنى الفترة الجاية تكون أفضل".

وتابع: "أتمنى لبيسيرو يقدر يتعامل بإيجابية الفترة الجاية، الأهلى فرقة بطولات، ومش داخل يخسر ماتشين فى بداية الدورى، ونتمنى يتجاوز السلبيات دى".

وأضاف مختار: "وبالنسبة للاعبين اللى ملعبوش زى أحمد الشيخ، ده عيب فى المدرب الأجنبى، أنه مش بيعرف اللاعبين الجدد، المدير الفنى الأجنبى الجديد له إيجابيات وسلبيات، المعايشة مع اللاعبين مختلفة، وبتحتاج لوقت، والوقت دلوقتى مش فى صالح الأهلى، وأظن أن بيسيرو خد وقته فى الإمارات، وعرف اللاعبين بشكل كويس، ودلوقتى معندوش حجة، بيسيرو بقاله شهرين فى الأهلى، لكن مفيش إيجابية لغاية دلوقتى".

وواصل: "موضوع تدخل مجلس الإدارة فى عمل الجهاز الفنى لا يصح، لكلا الطرفين عمل معين، ولا يتدخل أى طرف فى عمل الآخر، ممكن الشغل ده، يعمله الكابتن زيزو، وأتمنى يكون صبرنا خير فى الآخر".

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع 4 مرات أسبوعيًا، من الأحد إلى الأربعاء فى تمام العاشرة صباحًا، ولمدة ساعة.