El Radio 9090 FM
#
يا ساتر يارب.. دى الملاية كانت ساترة بلاوى يا جدع

يا ساتر يارب.. دى الملاية كانت ساترة بلاوى يا جدع

صلوا بينا على النبى، فايتة من كام يوم فى ميدان ما فى محافظة ما، وفجأة ألاقى دوشة وكهربا وتعاليق وورد أبيض وأحمر.

وسيادة البيه رئيس الحى، ومعاه لفيف بهوات كلهم ببدل بُنى وياقات منّشية، وعيال حلوين مغرقين لهم شعرهم فازلين وفارقين لهم من النص وملبسينهم لبس العيد وواقفين صفين وبيغنوا ويجعّروا "يا حبيبتى يا مصر يا مصر".

ومزيكا القِرَب تصدح فى كل مكان، وحاجة كدا زى فرح بنت أخت العمدة على الآخر.

أبص لك فى النص ألاقيلك ملاية بيضا كبيرة ملفوفة على حاجة كبيرة كدا، قلت استنى يا بت، ليكون مقام جديد أو ليكونوا اكتشفوا بير بترول فى نص الشارع.

شوية والمزيكا عِلْيت واشرأبت الأعناق، والعيال بطلوا جعير، وتقدم البيه المنشى واثق الخطى، وهوب راح شادد الحبل ووقعت الملاية.

الكل صفق، النسوان تزغرط والرجالة تهتف الله أكبر والعيال تتنطط هيه هيه هيه، وأنا أزاحم بين أمواج البشر.. حلفت لازم أشوف الحدث الضخم ده بعينى، لأن ما يبقاش اسمه كلام.. أحضر وماشوفش.

القصد بلاد تشيلنى وبلاد تحطنى وأخيرا وصلت.

سلام قولا من رب رحيم.. يا ساتر يا رب ليه كده، دى الملاية كانت ساترة بلاوى يا جدع.. دارى يا عم الحاج دارى، غطى غطى الله يسترك، إذا بليتم فاستتروا.

حد يحتفل بوضع تمثال عزيزة ألومونيا فى ميدان عام، يا لهوى؟!!، أضرب بعينى تانى أتأكد.. ألاقى كائن حى كدا له عينين وحنك ودماغ كبيرة ولابس قمطة وكاتبين عليه "الملكة كليوباترا".

كليوباترا؟!، هو الفنان البوهيمى اللى قرر ينحت للغلبانة الله يرحمها تمثال، معداش ناحية متاحف بالغلط؟، بلاش.. مشافش تليفزيونات.. قطيعة بلاش ده كله، مجابش سيجارتين فرط حتى، وبص على العلبة فى حياته وعرف سحنة الست؟

دى المرحومة كانت طيبة يا جدع ومتستاهلش مننا كدا أبدا.

المشكلة مش فى كليوباترا لوحدها، دا قبلها بكام يوم حد عمل العملة السودا دى مع نفرتيتى طيب الله ثراها، نفرتيتى اللى العالم بيحلف بجمالها، عاديك يا خويا اتحولت على إيد فنانى تماثيل الميادين دوزل لرجل كنبة طالع لها مناخير بعيد عن السامعين، لأ وفين؟ فى مسقط رأس المرحومة، ويرجعوا يشتكوا من لعنة الفراعنة ويقولك أساطير.

وربنا ما أساطير.. أنا لو مكان الناس اللى نايمة فى الأهرامات ولا فى وادى الملوك دول والله لأطلع أقطع خلفهم نفر نفر.